No Mercy (2010)

No Mercy (2010)

Rather Be Killed Than Forgive 👌

പേര് പോലെ തന്നെ ഒട്ടും കരുണയില്ലാത്ത മറ്റൊരു കൊറിയൻ ത്രില്ലർ. എപ്പോഴും നായകന്റെ പക്ഷത്ത് നിന്ന്‌ മാത്രം ചിന്തിക്കുന്ന സാധാരണ പ്രേക്ഷകരെ വില്ലന്റെ കൂടി പക്ഷം നിർത്തുന്ന തീർത്തും വ്യത്യസ്തമായ മറ്റൊരു അസാധ്യ കൊറിയൻ സിനിമാ അനുഭവം കൂടിയാണ് ഈ സിനിമ സമ്മാനിക്കുന്നത്. ഒരു നിമിഷമെങ്കിലും കാണുന്ന പ്രേക്ഷകനെക്കൊണ്ട് വില്ലനോട് ദയ തോന്നിപ്പിക്കുന്ന തരത്തിലുള്ള കഥയും അതിന്റെ പൂർണതയിൽ എത്തിക്കുന്ന തരത്തിലുള്ള മേക്കിങ്ങും, പെർഫോമൻസും കൂടിയാകുമ്പോൾ സിനിമ വേറൊരു ലെവലിലേക്ക് പ്രേക്ഷകരെ കൊണ്ടെത്തിക്കുന്നുണ്ട്. 

ഒരുപാട് ഉദ്വേഗജനകമായ മുഹൂർത്തങ്ങളും ട്വിസ്റ്റുകളും കൊണ്ട് സമ്പന്നമായ ഈ സിനിമയുടെ കഥയിലേക്ക് കൂടുതൽ കടക്കുന്നില്ല. എന്നിരുന്നാലും ചുരുങ്ങിയ വാക്കിൽ പറഞ്ഞാൽ ഒരു കേസ് അന്വേഷണവും അത് അന്വേഷിക്കുന്ന മെഡിക്കൽ വിദഗ്ദ്ധന്റെ ജീവിതത്തിൽ ആ കേസ് എങ്ങനെ വഴിത്തിരിവായി മാറിയെന്നും ഉള്ളതാണ് സിനിമയുടെ പ്രമേയം. കൂടുതൽ പറഞ്ഞു സിനിമയുടെ ത്രിൽ നഷ്ടപ്പെടുത്തുന്നില്ല. 

കഴിഞ്ഞ ചില കൊറിയൻ സിനിമകൾ കണ്ടപ്പോൾ അവരുടെ സ്ക്രിപ്റ്റിങ്ങിലെ അപാരമായ കഴിവാണ് കണ്ടതെങ്കിൽ ഈ സിനിമ കണ്ടപ്പോൾ സ്ക്രിപ്റ്റ് മാത്രമല്ല അത് അഭിനയിച്ചു ഫലിപ്പിക്കാൻ കഴിവുള്ള ഒരുപിടി മികച്ച നടന്മാരും അവിടെയുണ്ട് എന്ന കാര്യം കൂടി മനസിലായി. സിനിമ കഴിഞ്ഞപ്പോൾ ഞാൻ അലോചിച്ചത് വില്ലനാണോ അതോ നായകനാണോ മികച്ചത് എന്നും ആരാണ് യഥാർത്ഥ വില്ലൻ, ആരാണ് ശരിക്കുള്ള നായകൻ എന്നും ആയിരുന്നു. അത് ഇപ്പോഴും ഉത്തരം കിട്ടാത്ത വലിയൊരു ചോദ്യമായി അവശേഷിക്കുമ്പോൾ സിനിമ എത്രത്തോളം മികച്ചതാണ് എന്ന കാര്യത്തിൽ യാതൊരു സംശയവുമില്ലാതെ പറയാം - മരിക്കുന്നതിന് മുമ്പ് കണ്ടിരിക്കേണ്ട ചിത്രങ്ങളിൽ ഒന്നാണിത് എന്ന്. 

NB:- മനസിന് കട്ടിയില്ലാത്തവരും ലോലഹൃദയരും ദയവായി ഈ സിനിമ കാണരുത്. കാരണം ഈ സിനിമയുടെ പേരിൽ തന്നെയുണ്ട്. 

#Naaz373