SALUTE (2022) MOVIE REVIEW

 

🎥 SALUTE (2022)

FILM BY ROSSHEN ANDRREWS

നിരവധി വിവാദങ്ങൾക്ക് ഒടുവിൽ ദുൽഖർ സൽമാന്റെ നിർമാണത്തിൽ  ഓടിടി റിലീസിന് എത്തിയ സിനിമ. അരവിന്ദ് കരുണാകരൻ എന്ന മുഴുനീള പോലീസ് ഓഫിസറുടെ വേഷത്തിൽ ദുൽഖർ ആദ്യമായി പോലീസ് കുപ്പായം അണിയുമ്പോൾ സിനിമ ഒരുപാട് പ്രതീക്ഷ നൽകിയിരുന്നു. ഒപ്പം റോഷൻ ആൻഡ്രൂസിന്റെ സംവിധാനം, ബോബി സഞ്ജയ് കൂട്ടുകെട്ടിന്റെ എഴുത്തും ആ പ്രതീക്ഷയുടെ ആഴം അൽപ്പം കൂട്ടിയെന്ന് പറയാം. സിനിമ പറഞ്ഞതിലും നേരത്തെ സോണി ലിവിൽ റിലീസ് ചെയ്തു.

2017 ൽ നടന്ന മാർട്ടിൻ - ഷീബ വധക്കേസ് ആസ്പദമായ അന്വേഷണ സംഘത്തിലെ അംഗമായ എസ്‌ഐ അരവിന്ദ് കരുണാകരൻ, ചില പ്രത്യേക സാഹചര്യത്തിൽ അയാൾക്ക് മനപ്പൂർവ്വം അല്ലാതെ ആ കേസിൽ മറ്റൊരാളെ പ്രതി ചേർക്കേണ്ടി വരുന്നതും, തന്റെ സഹോദരൻ ഉൾപ്പെടുന്ന സീനിയർ സഹപ്രവർത്തകരുടെ സമ്മർദത്തിന് വഴങ്ങി കേസിൽ വിട്ടുവീഴ്ച ചെയ്യേണ്ടി വരുന്നതും, നിരപരാധിയായ ഒരാൾ പ്രതിയാവാൻ താൻ കൂടി കാരണമായി എന്ന ചിന്തയും അയാളെ അലട്ടുന്നു. തുടർന്ന് അയാൾ 5 വർഷത്തെ അവധിയിൽ പോകുന്നതും സഹോദരിയുടെ വിവാഹത്തിന് വേണ്ടി നാട്ടിലേക്ക് വീണ്ടും എത്തുമ്പോൾ ഉണ്ടാവുന്ന ചില സംഭവങ്ങൾ പഴയ കേസിൽ വഴിത്തിരിവ് ആയി മാറുന്നു. തുടർന്ന് അയാൾ അന്ന് എവിടെ നിർത്തിയോ അവിടെ നിന്ന് പഴയ കേസ് ഫയൽ റീ ഓപ്പൺ ചെയ്യുന്നതും യഥാർത്ഥ പ്രതിയിലേക്ക് എത്തിച്ചേരുന്നത് വരെയുള്ള ഉദ്വേഗജനകമായ മുഹൂർത്തങ്ങളുമാണ് സിനിമ പ്രേക്ഷകനുമായി സംവദിക്കുന്നത്. കൂടുതൽ പറഞ്ഞാൽ സ്പോയ്ലർ ആകുമെന്നതിനാൽ കഥയിലേക്ക് കടക്കുന്നില്ല.

പോലീസ് കഥകളിൽ ഒരുപാട് കണ്ടിട്ടുള്ള കട്ടവനെ കിട്ടിയില്ലേൽ കിട്ടിയവനെ പിടിക്കുക എന്ന സ്ഥിരം പോലീസ് മുറ തന്നെയാണ് സിനിമയുടെ പ്രമേയം എങ്കിൽ കൂടിയും അതിന് പിന്നിൽ നാം അറിയാതെ പോകുന്ന മറ്റ് പലരുടെയും ജീവിതം കൂടി സിനിമ ചർച്ച ചെയ്യുന്നുണ്ട്.

പ്രകടനങ്ങൾ നോക്കിയാൽ ദുൽഖർ തന്റെ ആദ്യ പോലീസ് കഥാപാത്രം അത്യാവശ്യം തരക്കേടില്ലാത്ത രീതിയിൽ തന്നെ അവതരിപ്പിച്ചു. ഒപ്പം മനോജ് കെ ജയൻ, അലൻസിയർ, ലക്ഷ്മി ഗോപാലസ്വാമി, ബിനു പപ്പു, സുധീർ കരമന, ഇന്ദ്രൻസ് തുടങ്ങിയ വലിയൊരു താരനിര തന്നെ സിനിമയിലുണ്ട്. എന്നാൽ കാസ്റ്റിംഗിൽ ഏറ്റവും മോശമായി തോന്നിയൊരു കാര്യം മുരളി എന്ന കഥാപാത്രം ആയിരുന്നു. ആ കഥാപാത്രം ചെയ്ത നടൻ (പേരറിയില്ല) മോശം ആണെന്ന അഭിപ്രായം ഇല്ല. എന്നാൽ മണികണ്ഠൻ ആചാരിയുടെ ശബ്ദത്തിൽ ആ കഥാപാത്രത്തിന് ഡബ് ചെയ്തത് എവിടൊക്കെയോ അലോസരം സൃഷ്ടിച്ചു. മണികണ്ഠൻ ചേട്ടൻ തന്നെ ആ കഥാപാത്രത്തെ അവതരിപ്പിച്ചിരുന്നു എങ്കിൽ എന്ന് സിനിമ കാണുമ്പോൾ നിങ്ങൾക്ക് തോന്നിയാൽ തെറ്റ് പറയാൻ പറ്റില്ല. കാരണം ആ ശബ്ദത്തിൽ മറ്റൊരാളെ ചിന്തിക്കാൻ എനിക്ക് കഴിഞ്ഞില്ല, പ്രത്യേകിച്ച് അത്രയ്ക്ക് ഡെപ്ത് ഉണ്ടായിരുന്ന ഒരു കഥാപാത്രം കൂടിയായപ്പോൾ അത് പുള്ളി തന്നെ ചെയ്തിരുന്നേൽ കുറച്ചുകൂടി ഇംപാക്ട് ഉണ്ടായേനെ എന്ന് തോന്നി. പിന്നെ ഏറ്റവും വലിയ മിസ് കാസ്റ്റിങ് ആയി തോന്നിയത് നായകന് വേണ്ടി സൃഷ്ടിച്ചെടുത്ത നായിക ആയിരുന്നു. സ്ഥിരം ക്ലിഷേ നായിക എന്നതിലുപരി യാതൊരു കാര്യവുമില്ലാത്ത മറ്റൊരു കഥാപാത്രം. ബാക്കിയെല്ലാവരും അവരവരുടെ റോളുകൾ നന്നാക്കി. അതിൽ തന്നെ എടുത്തു പറയേണ്ടത് സുധീർ കരമനയുടെ ക്യാരക്ടർ ആയിരുന്നു. ഒരൊറ്റ സീനിലെ അദ്ദേഹം പ്രത്യക്ഷപെടുന്നുള്ളൂ എങ്കിലും ആ കഥാപാത്രത്തിന്റെ നിസ്സഹായത അത്രമേൽ ഗംഭീരം ആയി അവതരിപ്പിച്ചു. സിനിമയുടെ പ്രധാന വഴിത്തിരിവ് കൂടിയാണ് ആ രംഗം എന്നത് കൊണ്ട് കൂടുതൽ പറഞ്ഞു കുളമാക്കുന്നില്ല.

സിനിമയുടെ ടെക്നിക്കൽ സൈഡിലേക്ക് വന്നാൽ ജെയ്ക്സ് ബിജോയ് യുടെ ബിജിഎം തന്നെയാണ് സിനിമയെ കുറച്ചെങ്കിലും പിടിച്ചിരുത്തുന്നത്. ക്യാമറ വിഭാഗവും നന്നായിരുന്നു. എഡിറ്റിംഗ് കുറേക്കൂടി മികച്ചതാക്കിയിരുന്നു എങ്കിൽ ആദ്യ പകുതി എൻഗേജിങ് ആക്കി മാറ്റാമായിരുന്നു.

ഒരുപാട് കാലത്തിന് ശേഷം ബോബി സഞ്ജയ് കൂട്ടുകെട്ടിൽ ഒരു ത്രില്ലർ സിനിമ വരുമ്പോൾ അതിൽ കുറച്ചൊരല്പം പ്രതീക്ഷ കൂടുതൽ ഉണ്ടായത് കൊണ്ടാവാം സിനിമയുടെ ആദ്യ പകുതി ശരാശരിയിൽ ഒതുങ്ങിയതായി തോന്നി. കാരണം ആദ്യ പകുതി വളരെ പതിഞ്ഞ താളത്തിൽ തുടങ്ങുകയും, കഥ പറച്ചിലിൽ വന്ന ഇഴച്ചിലും ആസ്വാദനത്തെ ബാധിച്ചു. എന്നാൽ രണ്ടാം പകുതിയിൽ സിനിമ അതിന്റെ ത്രില്ലർ മൂഡിലേക്ക് മടങ്ങി വന്നു. ചില സീനുകൾ ഒക്കെ എൻഗേജിങ് ആയിരുന്നു. എന്നാൽ ക്ലൈമാക്സ് കഴിഞ്ഞു ആന്റി ക്ലൈമാക്സിലേക്ക് എത്തുമ്പോൾ എവിടൊക്കെയോ ചില ചോദ്യങ്ങളും സംശയങ്ങളും ബാക്കി വെച്ചാണ് സിനിമ അവസാനിപ്പിക്കുന്നത്. കുറച്ചുകൂടി ഡിറ്റയിലിങ് സിനിമ അവശ്യപ്പെടുന്നതായി തോന്നി. കാരണം അതുവരെ യഥാർത്ഥ പ്രതിയെക്കുറിച്ച് ഉണ്ടായിരുന്ന സകല ദുരൂഹതകളും  ഒരൊറ്റ സീനിൽ സിനിമ പറഞ്ഞു അവസാനിപ്പിക്കുമ്പോൾ അതിൽ എവിടെയോ ഒരു ചേർച്ചയില്ലായ്‌മ ഫീൽ ചെയ്തു. എന്നാലും തരക്കേടില്ലാത്ത രീതിയിൽ തന്നെ സിനിമ അവസാനിപ്പിക്കുന്നുണ്ട്.

ഒരു തവണ കണ്ടു മറക്കാവുന്ന ഒരു സിനിമ എന്നതിൽ കവിഞ്ഞ് യാതൊരു പുതുമയും സിനിമ സമ്മാനിക്കുന്നില്ല എന്ന് പറയേണ്ടി വരും. പ്രകടനം കൊണ്ടും പ്രമേയം കൊണ്ടും സിനിമ മികച്ചു നിൽക്കുന്നു എങ്കിൽ കൂടി ഒരു ത്രില്ലർ സിനിമ ആവശ്യപ്പെടുന്ന ചേരുവകൾ സിനിമ നൽകിയോ എന്ന ചോദ്യം ബാക്കിയാവുന്നു. സമയം ഉണ്ടെങ്കിൽ കണ്ടുനോക്കാവുന്ന ശരാശരിയ്ക്ക് മുകളിൽ നിൽക്കുന്ന എന്നാൽ യാതൊരു പുതുമയും സമ്മാനിക്കാത്ത മറ്റൊരു ത്രില്ലർ സിനിമ എന്ന് ഒറ്റവാക്കിൽ പറയാം.

#Naaz373 😊