ANTAKSHARI (2022) MOVIE REVIEW

 

🎥 അന്താക്ഷരി (2022)
സംവിധാനം:- വിപിൻ ദാസ്

സല്യൂട്ടിന് ശേഷം സോണി ലിവ് ഓടിടി പ്ലാറ്റ്ഫോമിൽ റിലീസായ മറ്റൊരു പോലീസ് ഇൻവെസ്റ്റിഗേഷൻ ത്രില്ലർ സിനിമയാണ് അന്താക്ഷരി. സൈജു കുറുപ്പ്, പ്രിയങ്ക നായർ, കോട്ടയം രമേശ്, സുധി കോപ്പ തുടങ്ങിയ മികച്ച താരനിര സിനിമയിലുണ്ട്.

സിനിമ ആരംഭിക്കുന്നത് ഒരു കൊലപാതക രാത്രിയിൽ നിന്നാണ്. പിന്നീട് അതിന് കാരണമായ ചില സംഭവങ്ങൾ, ചില വ്യക്തികൾ എന്നിവരിലൂടെ സഞ്ചരിച്ചു കൊണ്ട് സിനിമ പോലീസ് ഓഫീസറായ നായകനിൽ എത്തിച്ചേരുന്നു. ഇതിനിടയിൽ സംഭവിക്കുന്ന കാര്യങ്ങൾ (സ്പോയ്ലർ ആയതുകൊണ്ട് കൂടുതൽ പറയുന്നില്ല) ആണ് സിനിമയുടെ കഥയ്ക്ക് ആസ്പദമായിട്ടുള്ളത്. തുടർച്ചയായി ഒരേ രീതിയിൽ ആവർത്തിക്കുന്ന കൊലപാതകങ്ങൾ, അതിന്റെ അന്വേഷണ ചുമതലയുള്ള നായകൻ, അതിനെ തുടർന്ന് ദുരൂഹത നിറഞ്ഞ സാഹചര്യത്തിൽ ചില വ്യക്തികളെ കാണുന്നതും അതിനെ തുടർന്ന് അയാളുടെ ജീവിതത്തിലും കുടുംബത്തിലും കൊലയാളി സൃഷ്ടിക്കുന്ന ഭയവും ഭീതിയും മൂലമാണ് സിനിമ പ്രേക്ഷകരെ വേട്ടയാടുന്നത്.

നമ്മുടെ നായകന് മറ്റൊരു പ്രത്യേകത കൂടിയുണ്ട്. പാട്ടുകൾ ഇഷ്ടപ്പെടുന്ന അയാളുടെ പ്രധാന വിനോദം അന്താക്ഷരി കളിക്കുന്നതാണ്. സ്റ്റേഷനിൽ എത്തുന്ന പ്രതികൾക്കൊപ്പം വരെ അദ്ദേഹം ഈ വിനോദത്തിൽ ഏർപെടാറുണ്ട്. എന്നാൽ കളി കാര്യമായതിന് ശേഷം കൊലയാളി ഇതേ അന്താക്ഷരി ഉപയോഗിച്ച് കൊണ്ട് നായകനെ ഭയപ്പെടുത്താൻ ശ്രമിക്കുന്നതും, അതിലൂടെ ആനന്ദം കണ്ടെത്തുന്നതും വിചിത്രമായി തോന്നി. അതേപോലെ തന്നെ നായകന്റെ ബുള്ളറ്റും കൊലയാളിയും തമ്മിലുള്ള ബന്ധവും നായകന് അടുത്തേക്ക് എളുപ്പത്തിൽ പ്രതിയെ എത്തിക്കുന്നു. അതുകൊണ്ട് തന്നെ സിനിമ ചുരുങ്ങിയ സമയത്തിൽ ഒതുക്കാനും വലിച്ചുനീട്ടൽ ഒഴിവാക്കാനും സംവിധായകന് ഒരു പരിധിവരെ കഴിഞ്ഞിട്ടുണ്ട്. എന്നിരുന്നാലും വെറുമൊരു ബുള്ളറ്റിന്റെ പേരിൽ അത് കൈവശം വെക്കുന്നവരെ എല്ലാം തന്നെ വകവരുത്താൻ ശ്രമിക്കുന്ന, അതിപ്പോൾ വില്ലന് നേരിട്ട് അറിയുക പോലുമില്ലാത്ത ആളുകളെ വരെ കൊല്ലാൻ ശ്രമിക്കുന്ന വില്ലന്റെ ലോജിക് എത്ര ആലോചിച്ചിട്ടും മനസിലായില്ല. കഥ കുറേക്കൂടി convincing ആക്കിയിരുന്നു എങ്കിൽ ഇതിനേക്കാൾ നന്നായേനെ.

പ്രകടനങ്ങൾ കൊണ്ട് എല്ലാവരും മികവ് പുലർത്തിയപ്പോൾ അതിൽ തന്നെ വേറിട്ട പെർഫോമൻസ് ആയിരുന്നു കോട്ടയം രമേശ് അവതരിപ്പിച്ച പോലീസ് ഓഫീസറുടേത്. സത്യത്തിൽ ഒരു നിമിഷം വില്ലൻ ഇനി ഇങ്ങേരാണോ എന്ന് വരെ ചിന്തിച്ചു പോയി. അത്ര ഗംഭീരമായ നെഗറ്റീവ് ടച്ചുള്ള ക്യാരക്ടർ അദ്ദേഹം വളരെ കയ്യടക്കത്തോടെ തന്നെ ചെയ്തു.

പാട്ടുകൾക്ക് പ്രാധാന്യമുള്ള സിനിമയിൽ എന്നാൽ ഗാനങ്ങൾ ഒന്നും തന്നെയില്ല എന്നത് മറ്റൊരു പ്രത്യേകതയാണ്. പശ്ചാത്തല സംഗീതവും ഛായാഗ്രഹണവും കയ്യടി അർഹിക്കുന്നു. സിനിമയുടെ ത്രില്ലർ മൂഡിനോട് ചേർന്ന് നിൽക്കുന്ന തരത്തിലുള്ള ബിജിഎം.

തിരക്കഥ കുറേക്കൂടി ശ്രദ്ധിച്ചിരുന്നു എങ്കിൽ ഇതിനേക്കാൾ നല്ലൊരു ത്രില്ലർ ആക്കാമായിരുന്ന സിനിമ എന്നാൽ പോലും ഒരു തവണ കാണാം. അധികം ലാഗോ വലിപ്പിക്കലോ ഇല്ലാതെ പറയാനുള്ളത് മാത്രം പറഞ്ഞു പോകുന്ന നല്ലൊരു ത്രില്ലർ സിനിമയാണ് അന്താക്ഷരി.

#Naaz373 😊