Chup - Revenge of An Artist (2022) MOVIE REVIEW

 

🎥 Chup - Revenge of An Artist (2022)

A Film by R. Balki

ദുൽഖർ സൽമാൻ, സണ്ണി ഡിയോൾ, പൂജ ഭട്ട്, ശ്രേയ ധന്വന്തരി എന്നിവർ പ്രധാന കഥാപാത്രങ്ങളെ അവതരിപ്പിച്ച സിനിമയാണ് ചുപ്. സിനിമ പ്രിവ്യൂ കഴിഞ്ഞത് മുതൽ ഗംഭീര പ്രതികരണം ആണ് ലഭിച്ചത്. അതുകൊണ്ട് തന്നെ പ്രതീക്ഷ വാനോളം ആയിരുന്നു.

സിനിമയിലേക്ക്...
നഗരത്തിൽ തുടർച്ചയായി നടക്കുന്ന കൊലപാതകങ്ങളിൽ കൂടിയാണ് സിനിമ ആരംഭിക്കുന്നത്. ഈ കൊലപാതകങ്ങൾക്ക് എല്ലാം തന്നെ പൊതുവായ ഒരു ഘടകം ഉണ്ടായിരുന്നു. കൊല ചെയ്യപ്പെട്ടവർ എല്ലാവരും തന്നെ സിനിമാ നിരൂപകരും അവരുടെ റിവ്യൂ അടിസ്ഥാനമാക്കിയാണ് കൊലയാളി തന്റെ പ്ലാൻ എക്സിക്യൂട്ട് ചെയ്തത്. ഈ കേസ് അന്വേഷിക്കുന്ന പോലീസ് ഉദ്യോഗസ്ഥന്റെ വേഷത്തിൽ സണ്ണി ഡിയോൾ എത്തുമ്പോൾ നായികയുടെ റോളിൽ ശ്രേയ ധന്വന്തരിയും പോലീസിനെ സഹായിക്കുന്ന ക്രിമിനൽ സൈക്കോളജിസ്റ്റ് ആയി പൂജ ഭട്ടും മികച്ച പ്രകടനം കാഴ്ച വെക്കുന്നു.

സിനിമ വളരെ സ്ലോ പേസിൽ ഒരു ത്രില്ലർ സിനിമയുടെ സ്ഥിരം ഒച്ചപ്പാടുകളോ ബിജിഎമ്മിന്റെ ബഹളങ്ങളോ ഒന്നുമില്ലാതെ സൈലന്റ് ആയിട്ടാണ് സിനിമ സഞ്ചരിക്കുന്നത്. എന്നാൽ സിനിമ ട്രാക്കിൽ കേറിയത് മുതൽ പിന്നീട്‌ അങ്ങോട്ട് സസ്പെൻസ് ഓരോ സെക്കന്റിലും കാണുന്നവർക്ക് ഫീൽ ചെയ്യിക്കാനും അടുത്തത് എന്താണ് എന്ന ചോദ്യം മനസ്സിൽ തോന്നിപ്പിക്കുന്ന വിധം ഗംഭീരമായി തന്നെയാണ് സംവിധായകൻ സിനിമ ഒരുക്കിയിരിക്കുന്നത്.

സണ്ണി ഡിയൊളിന്റെ പോലീസ് വേഷം ഒരുപാട് ഇഷ്ടപ്പെട്ടു. ചില സീനിലെ ആ കഥാപാത്രം അനുഭവിക്കുന്ന നിസ്സഹായത ഒക്കെ അദ്ദേഹം മനോഹരമായി തന്നെ ചെയ്തിട്ടുണ്ട്.

ദുൽഖർ സൽമാൻ എന്ന വളർന്നു കൊണ്ടിരിക്കുന്ന പാൻ ഇന്ത്യൻ താരത്തിന്റെ കരിയറിലെ മറ്റൊരു പൊൻ തൂവൽ കൂടിയാണ് ഈ ചിത്രം. സ്ക്രിപ്റ്റ് സെലക്ഷൻ ആയാലും, അഭിനയം ആയാലും യാതൊരു കുറ്റവും പറയാനില്ലാത്ത വിധം ഗംഭീരമായി തന്നെ അദ്ദേഹം ഡാനി (സാങ്കൽപിക പേര് - യഥാർത്ഥ പേര് പറഞ്ഞാൽ സ്പോയിലർ ആകും !!!) എന്ന ക്യാരക്ടർ മികച്ചത് ആക്കി മാറ്റി.

നായികാ വേഷത്തിൽ വന്ന ശ്രേയാ ധന്വന്തരി, തമിഴ് നടി ശരണ്യ മോഹൻ, പൂജ ഭട്ട് തുടങ്ങി എല്ലാവരും അവരവരുടെ റോളുകൾ മികവിൽ എത്തിച്ചു. സിനിമയുടെ പിന്നെ എടുത്തു പറയേണ്ട പ്രധാന ആകർഷണം ബിജിഎം, ക്യാമറ വർക്ക് ആണ്. എഡിറ്റിംഗ് പ്രത്യേകം കയ്യടി അർഹിക്കുന്നു. ഒരു സെക്കന്റ് പോലും പ്രേക്ഷകനെ ബോറടിപ്പിക്കുന്നില്ല. അതുപോലെ തന്നെ സിനിമയുടെ സസ്പെൻസ് അവസാന നിമിഷം വരെ നിലനിർത്തി കൊണ്ട് പോകാനും കഴിഞ്ഞു.

കുടുംബത്തോടൊപ്പം കാണാവുന്ന ബോളിവുഡിൽ വളരെ കാലത്തിന് ശേഷം സംഭവിച്ച നല്ലൊരു കിടിലൻ ത്രില്ലർ - ചുപ് !

#Naaz373 😊