THIRUCHITRAMBALAM (2022) MOVIE REVIEW

 

🎥 Thiruchitrambalam aka തിരുചിദ്രമ്പലം (2022)

A Film by Mithran R Jawahar

ധനുഷ്, നിത്യ മേനോൻ, പ്രകാശ് രാജ്, ഭാരതി രാജ, റാഷി ഖന്ന, പ്രിയ ഭവാനി ശങ്കർ തുടങ്ങിയ വലിയൊരു താരനിര യുള്ള ചിത്രം എന്ന നിലയിൽ നല്ല പ്രതീക്ഷയുള്ള സിനിമ. തമിഴിൽ തന്റെ ഓരോ സിനിമ കഴിയും തോറും തന്നെ ഗ്രാഫ് ഒരുപടി മുകളിലേക്ക് ഉയർത്തി കൊണ്ടുവരുന്ന മുൻനിര നടന്മാരിൽ ഒരാളാണ് ധനുഷ്. സ്ക്രിപ്റ്റ് സെലക്ഷന്റെ കാര്യത്തിൽ ആയാലും പെർഫോമൻസിന്റെ കാര്യത്തിൽ ആയാലും ഇന്ന് അദ്ദേഹത്തെ വെല്ലാൻ കോളിവുഡിൽ മറ്റൊരു യുവനടനില്ല എന്ന് തന്നെ പറയാം. അതിന്റെ ഏറ്റവും അവസാനത്തെ ഉദാഹരണമാണ് ഈ സിനിമ.

തമിഴിൽ ഏറ്റവും കൂടുതൽ ചുളുവിൽ വിറ്റ് പോകുന്ന ഐറ്റമാണ് 'പാസം' അഥവാ കുടുംബ സ്നേഹം. ഇപ്പോൾ ഇറങ്ങുന്ന ഭൂരിഭാഗം സിനിമയിലും അതിന്റെ അതിപ്രസരം വ്യക്തമായി കാണാം. കാണുന്ന പ്രേക്ഷകർക്ക് മടുത്തിട്ടും അവിടുത്തെ സംവിധായകർക്കും നടന്മാർക്കും ഇപ്പോഴും അത് ചെയ്യാൻ യാതൊരു മടിയുമില്ല. കഥാപരമായി നോക്കിയാൽ ഈ സിനിമയും സ്ഥിരം പറയുന്ന കാര്യങ്ങൾ ഒക്കെ തന്നെയാണ് പറയാൻ ശ്രമിക്കുന്നത്. അച്ഛൻ - മകൻ ബന്ധം, മകനും മുത്തച്ഛനും തമ്മിലുള്ള ബന്ധം, അങ്ങനെ മൂന്ന് തലമുറകൾ തമ്മിലുള്ള കണക്ഷൻ വളരെ മനോഹരമായി പറഞ്ഞു പോകുന്ന സിനിമ. ഒരു മിനിറ്റ് പോലും കാണുന്നവരെ ബോറടിപ്പിക്കുന്നില്ല എന്നതിലാണ് ഈ ചിത്രം മറ്റുള്ളവയിൽ നിന്ന് വേറിട്ട് നിൽക്കാൻ കാരണം. മേക്കിങ്ങും, പെർഫോമൻസും, മ്യൂസിക്കും, വിഷ്വൽസും അങ്ങനെ ഒരു സിനിമയ്ക്ക് വേണ്ട ചേരുവകൾ എല്ലാം കൃത്യമായ അളവിൽ ഒരുക്കി ചേർത്താണ് സംവിധായകൻ മിത്രൻ ജവഹർ തന്റെ സിനിമ പ്രേക്ഷകരിലേക്ക് എത്തിച്ചിരിക്കുന്നത്.

അഭിനേതാക്കളുടെ കാര്യം എടുത്താൽ അതിൽ ആദ്യം പറയേണ്ടത് ഈ സിനിമയ്ക്ക് ജീവൻ നൽകിയ തെന്നിന്ത്യയുടെ പ്രിയങ്കരിയായ നടി നിത്യ മേനോനാണ്. ധനുഷ് ഒരിക്കൽ പറഞ്ഞത് നിത്യ മേനോൻ ഇല്ലെങ്കിൽ ചിലപ്പോൾ ഈ സിനിമ സംഭവിക്കുമായിരുന്നില്ല എന്ന്. അത് അക്ഷരം പ്രതി ശരിയാണെന്ന് തെളിയിക്കുന്ന ഗംഭീര പെർഫോമൻസ് തന്നെയാണ് അവർ കാഴ്ച വെച്ചിരിക്കുന്നത്. സിനിമ കണ്ടു കഴിഞ്ഞാലും ശോഭന എന്ന കഥാപാത്രം അങ്ങനെ പെട്ടെന്ന് മനസ്സിൽ നിന്നും മായില്ല. അത്ര മികച്ച കെമിസ്ട്രിയാണ് ധനുഷ് - നിത്യ തമ്മിലുള്ളത്. അതേപോലെ തന്നെ ഭാരതിരാജ, പ്രകാശ് രാജ് ഇവരുടെ കോമ്പിനേഷനും സിനിമയ്ക്ക് മുതൽക്കൂട്ടായി.

ഓം പ്രകാശിന്റെ ഫ്രയിമുകളും, അനിരുദ്ധ്ന്റെ പാട്ടുകളും ബിജിഎം സിനിമയുടെ പ്ലസ് പോയിന്റുകളാണ്. രണ്ടുമണിക്കൂർ മാറ്റിവച്ചു കണ്ടാൽ നിങ്ങൾക്ക് നല്ലൊരു ഫീൽ ഗുഡ് മൂഡിൽ ധൈര്യമായി കണ്ട് അസ്വദിക്കാനുള്ളത് സിനിമയിലുണ്ട്.

#Naaz373 😊