Mukundan Unni Associates (2022) MOVIE REVIEW

 

🎥 Mukundan Unni Associates (2022)
A Film by Abhinav Sunder Nayak

വിനീത് ശ്രീനിവാസൻ, സുരാജ് വെഞ്ഞാറമൂട്, സുധി കോപ്പ, തുടങ്ങി മികച്ച താരങ്ങൾ അണിനിരന്ന നവാഗതനായ അഭിനവ് സുന്ദർ നായക് സംവിധാനം ചെയ്ത് പുറത്തിറങ്ങിയ സിനിമയാണ് മുകുന്ദൻ ഉണ്ണി അസോസിയേറ്റ്‌സ്. വിനീത് ശ്രീനിവാസൻ ടൈറ്റിൽ റോളിൽ തിളങ്ങിയ സിനിമ ഒരേസമയം നായകനും നായകനിലെ വില്ലനെയും ഗംഭീരമായി വരച്ചു ചേർക്കുമ്പോൾ വിനീത് മുകുന്ദൻ ഉണ്ണിയെന്ന ക്രിമിനൽ വക്കീലായി ജീവിക്കുകയായിരുന്നു.

സിനിമയുടെ ഏറ്റവും വലിയ പോസിറ്റീവ് അതിന്റെ വേറിട്ട അവതരണ രീതി തന്നെയാണ്. കാരണം നമ്മൾ ഇന്നുവരെ കണ്ടു പരിചയമില്ലാത്ത, എന്നാൽ പ്രേക്ഷകനെ കഥയും കഥാപാത്രങ്ങളും ആയി വേഗത്തിൽ കണക്റ്റ് ചെയ്യിപ്പിക്കുന്ന വിധത്തിലാണ് സിനിമ ഒരുക്കിയിരിക്കുന്നത്. അതിന്റെ പൂർണ ക്രെഡിറ്റും സംവിധായകന് മാത്രം അവകാശപ്പെട്ടതാണ്. കാരണം അത്രയ്ക്ക് സൂക്ഷ്മമായിട്ടാണ് ചിത്രത്തിലെ ഓരോ കഥാപാത്രങ്ങളെയും നമുക്ക് മുന്നിലെത്തിക്കുന്നത്. അതിൽ തന്നെ ഏറ്റവും സങ്കീർണമായ കഥാപാത്രം ആണ് വിനീത് അവതരിപ്പിച്ചു കയ്യടി നേടിയ മുകുന്ദൻ ഉണ്ണി എന്ന ടൈറ്റിൽ ക്യാരക്ടർ. ആ കഥാപാത്രം സംവിധായകന്റെ കയ്യൊപ്പ് പതിഞ്ഞ, എഴുത്തുകാരന്റെ വിരലടയാളം ഉള്ള മലയാളത്തിൽ അപൂർവങ്ങളിൽ അപൂർവമായി മാത്രം സംഭവിക്കുന്ന ഒന്നായിരുന്നു. അതിന്റെ കാരണം സിനിമ കാണുമ്പോൾ നിങ്ങൾക്ക് മനസിലാവും. മുകുന്ദൻ ഉണ്ണിയുടെ മനസ്സിനുള്ളിൽ നടക്കുന്ന അയാളുടെ തന്നെ ചിന്തകളും, ആത്മഗതങ്ങളും, എന്തിനേറെ ആ കഥാപാത്രത്തിന്റെ പൂർണ വ്യക്തിത്വം തന്നെ സിനിമയിൽ അതേപടി വരച്ചു വെച്ച പോലൊരു ഫീൽ ആയിരുന്നു. നടന്റെയും, എഴുത്തുകരന്റെയും, സംവിധായകന്റെയും അധ്വാനം തന്നെയാണ് ഈ സിനിമയുടെ വലിയ വിജയത്തിന് കാരണം. ഒരേസമയം നമുക്ക് സ്നേഹവും, ദേഷ്യവും, വെറുപ്പും തോന്നിപ്പിക്കുന്ന തരത്തിലുള്ള വളരെ സങ്കീർണമായ വിവിധ മനോഭാവങ്ങൾ ഒരേസമയം മിന്നിമറയുന്ന ഒരു അഡാർ ഐറ്റം തന്നെയാണ് അഡ്വക്കേറ്റ് മുകുന്ദൻ ഉണ്ണി. കൂടുതൽ പറഞ്ഞു നിങ്ങളുടെ ആസ്വാദനം തടസ്സപ്പെടുത്തുന്നില്ല. ബാക്കി കണ്ടറിയുക. ഒരിക്കൽ നിങ്ങൾ അയാളെ പരിചയപ്പെട്ടാൽ പിന്നൊരിക്കലും നിങ്ങൾ അയാളെ മറക്കില്ല.

ഒരുപാട് ലയറുകൾ ഉള്ള ഒരു കിടിലൻ ക്യാരക്ടർ, അതിനെ അതിന്റെ ഏറ്റവും മികവിൽ മേക്ക് ചെയ്തു പ്രേക്ഷകൻ മുന്നിൽ പ്രെസെന്റ് ചെയ്‌ത സംവിധായകൻ അഭിനവ് സുന്ദർ നായകം തന്നെയാണ് ഈ സിനിമയുടെ യഥാർത്ഥ 'നായകൻ'. വിനീത് ശ്രീനിവാസൻ എന്ന നടന്റെ കരിയർ ബെസ്റ്റ് എന്ന് നിസ്സംശയം പറയാവുന്ന സിനിമ, കൂടാതെ സിനിമയുടെ മറ്റ് വിഭാഗങ്ങളും പ്രശംസ അർഹിക്കുന്നു. എഡിറ്റിംഗ്, ക്യാമറ, ബിജിഎം അങ്ങനെ എല്ലാം ഒന്നിനൊന്നു മെച്ചം. പരീക്ഷണ സിനിമകൾ പരാജയം ആകുന്ന സ്ഥിരം കാഴ്ചയാകുന്ന മലയാള സിനിമയ്ക്ക് വളരെ കാലത്തിന് ശേഷം വീണു കിട്ടിയ ഒരു ഗംഭീര ഗിഫ്റ്റ് തന്നെയാണ് മുകുന്ദൻ ഉണ്ണി അസോസിയേറ്റ്‌സ്.

കാത്തിരിക്കുന്നു, മുകുന്ദൻ ഉണ്ണിയുടെ രണ്ടാം വരവിനായി...
അഭിനവ് സുന്ദർ - നിങ്ങൾ നാളത്തെ മലയാള സിനിമയുടെ ഭാവിയാണ്, ഇനിയും ഇതുപോലുള്ള വ്യത്യസ്ത പരീക്ഷണങ്ങൾ പ്രതീക്ഷിക്കുന്നു. വേറിട്ട സിനിമകളെ ഇരുകയ്യും നീട്ടി ഒരുകൂട്ടം പ്രേക്ഷകർ ഇവിടെയും ഉണ്ടെന്ന് താങ്കളുടെ സിനിമ തെളിയിച്ചു.

#Naaz373 😊