Thunivu (2023) MOVIE REVIEW

 

🎥 തുനിവ് (2023)
സംവിധാനം:- H. വിനോദ്

വലിമയ്ക്ക് ശേഷം അജിത്തും സംവിധായകൻ എച്ച്. വിനോദും ഒന്നിച്ച ഏറ്റവും പുതിയ സിനിമ, ട്രയ്ലർ നൽകിയ പ്രതീക്ഷ, അജിത് കുമാർ എന്ന നടനോടുള്ള ഇഷ്ടം എന്നീ ഘടകങ്ങൾ ആണ് ഈ സിനിമയ്ക്ക് ടിക്കറ്റ് എടുക്കാൻ എന്നെ പ്രേരിപ്പിച്ചത്. അത് മാത്രമല്ല വിരളമായി മാത്രമാണ് ഇവിടെ തമിഴ് സിനിമകൾ റിലീസ് ചെയ്യുന്നത്. അതുകൊണ്ട് തന്നെ കിട്ടിയ ചാൻസ് മിസ്സ്‌ ആക്കിയില്ല.

സിനിമയിലേക്ക്...
ട്രെയിലറിൽ കണ്ടത് പോലെ തന്നെ ഒരു ബാങ്ക് കൊള്ളയും അതിന് പിന്നിലെ കാരണങ്ങളുമാണ് സിനിമയുടെ പ്രമേയം. ഒരേ സമയം നായകനായും വില്ലനായും പൂണ്ട് വിളയാടിയ അജിത്ത് എന്ന നടനും അദ്ദേഹത്തിന്റെ ഗംഭീര പെർഫോമൻസും സ്ക്രീൻ പ്രെസെൻസും തന്നെയാണ് സിനിമയുടെ നട്ടെല്ല് എന്ന് നിസ്സംശയം പറയാം. അതുപോലെ തന്നെ ക്വാളിറ്റി യുള്ള ആക്ഷൻ രംഗങ്ങൾ കൊണ്ട് സിനിമ എന്നിലെ പ്രേക്ഷകനെ ത്രസിപ്പിക്കുന്ന അനുഭവം ആയിരുന്നു. ചിലയിടങ്ങളിൽ വരുന്ന ലോജിക് ഇല്ലായ്മ മാറ്റി നിർത്തിയാൽ തിയേറ്ററിൽ പോയി കാണാവുന്ന നല്ലൊരു ആക്ഷൻ പാക്കഡ് എന്റർടൈനർ തന്നെയാണ് തുനിവ്.

ഒപ്പമുണ്ടായിരുന്ന മഞ്ജു വാര്യരുടെ കഥാപാത്രത്തിനും നല്ല സ്ക്രീൻ സ്‌പേസ് നൽകിയിട്ടുണ്ട്. കൂടാതെ സമുദ്രക്കനി, ഭഗവതി പെരുമാൾ, ജോണ് കൊക്കൻ, സിജോയ് വർഗീസ് തുടങ്ങിയവർ ഒക്കെ തന്നെ അവരവരുടെ റോളുകൾ നന്നാക്കി. വി എഫ് എക്‌സ് വിഭാഗവും നന്നായിരുന്നു. ബോംബ് ബ്ലാസ്റ്റ്‌ സീനുകളിൽ ഒക്കെ നല്ല രീതിയിൽ തന്നെ വിഷ്വൽ എഫക്ട്സ് യൂസ് ചെയ്തിട്ടുണ്ട്. ജിബ്രാൻ ഒരുക്കിയ പാട്ടുകളും ബിജിഎം ശരാശരി ആയേ തോന്നിയുള്ളൂ.

വലിമയ്ക്ക് ഈ സിനിമയിൽ നിന്നുള്ള പ്രധാന വ്യത്യാസം ഇതിൽ അനാവശ്യ സീനുകൾ ഒന്നും തന്നെ ഉണ്ടായിരുന്നില്ല. പ്രത്യേകിച്ച് 'കുടുംബ പാസം'. അതുപോലെ ആദ്യം മുതൽ തന്നെ സിനിമ നല്ല രീതിയിൽ എൻഗേജ് ചെയ്യിക്കുന്നുമുണ്ട്. കാര്യമായ ലാഗോ ബോറടിയോ തോന്നിയില്ല. എന്നിരുന്നാലും എച്ച്. വിനോദ് എന്ന സംവിധായകന്റെ ഏറ്റവും മികച്ച സിനിമ എന്ന് ഒരിക്കലും തുനിവിനെ പറയാനാവില്ല. തീരനും, ചതുരംഗ വേട്ടയും പോലുള്ള ഗംഭീര സിനിമകൾ സമ്മാനിച്ച അദ്ദേഹത്തിൽ നിന്നും ഇതിലേറെ പ്രേക്ഷകർ പ്രതീക്ഷിക്കുന്നുണ്ട്. അത് തന്നെയാണ് സിനിമയ്ക്ക് ആദ്യ മണിക്കൂറുകളിൽ വന്ന നെഗറ്റീവ് അഭിപ്രായങ്ങൾക്ക് ഉള്ള ഒരു കാരണം. അതുകൊണ്ട് അദ്ദേഹത്തിന്റെ ഏറ്റവും മികച്ച വർക്കിനായി ഇനിയും കാത്തിരിക്കണം.

പൊങ്കൽ സീസണിൽ കുടുംബവും കൂട്ടുകാരുമായി ആഘോഷിച്ചു കാണാൻ പറ്റിയ സിനിമ തന്നെയാണ് തുനിവ്. ഒരു കംപ്ലീറ്റ് മാസ്സ് ആക്ഷൻ സിനിമയ്ക്ക് വേണ്ട എല്ലാ ചേരുവകളും സിനിമയിലുണ്ട്.

NB:- ഫാൻസിന്റെ അനാവശ്യ അഭിപ്രായങ്ങൾ കേൾക്കാതെ പോയി സിനിമ കാണുക. പരസ്പരം ചളി വാരിയേറിയുന്ന ഫാൻസിന് എപ്പോഴും അവരുടെ ഇഷ്ട നടന്റെ സിനിമ മാത്രമാണ് നല്ലത്. സോ സ്വന്തമായി സിനിമ കണ്ട് വിലയിരുത്തുക.

#Naaz373 😊