Varisu (2023) MOVIE REVIEW

 

🎥 Varisu (2023)

A Film by Vamshi Paidippally

വിജയ്, രാഷ്മിക, ശരത് കുമാർ, പ്രകാശ് രാജ്, യോഗി ബാബു, ജയസുധ തുടങ്ങിയ വലിയ താരനിര കൊണ്ട് തെലുങ്ക് സംവിധായകൻ വംശി പൈടിപള്ളി അണിയിച്ചൊരുക്കി പൊങ്കൽ റിലീസായി പുറത്തിറങ്ങിയ സിനിമയാണ് വാരിസ്.

തന്റെ തന്നെ മുൻ സിനിമകളിൽ കണ്ട് വരുന്ന സ്ഥിരം മാസ്സ് മസാല ചേരുവകൾ ഒക്കെ തന്നെയാണ് വിജയ് ഇതിലും ചെയ്തിരിക്കുന്നത്. വൻകിട ബിസിനസ് സാമ്രാജ്യത്തിന്റെ ഉടമയായ അച്ഛൻ, അച്ഛന്റെ മൂന്ന് ആൺ മക്കൾ, അവരിലെ ഏറ്റവും ഇളയതും അച്ഛന്റെ ഭാഷയിൽ 'മുടിയനായ പുത്രനുമായ' നമ്മുടെ നായകൻ, പെട്ടെന്ന് ഒരിക്കൽ അച്ഛൻ രോഗബാധിതനാകുകയും തന്റെ പിന്തുടർച്ച അവകാശിയെ കണ്ടെത്തുന്നതും, വീട് വിട്ടിറങ്ങിയ നായകൻ അച്ഛന്റെ ഷഷ്ഠിപൂർത്തി ആഘോഷിക്കുവാനായി അമ്മയുടെ നിർബന്ധ പ്രകാരം വർഷങ്ങൾക്ക് ശേഷം തിരികെ തന്റെ കുടുംബത്തിലേക്ക് തിരികെ വരുന്നതും തുടർന്ന് ആ 'വലിയ' കുടുംബത്തിൽ നടക്കുന്ന സംഭവ വികസങ്ങളുമാണ് സിനിമയുടെ പ്രമേയം. ഒരുപാട് സിനിമകളിൽ കണ്ട് മറന്ന കഥയും കഥാപാത്രങ്ങളും ആണെങ്കിൽ പോലും ആദ്യ പകുതിയിൽ ചില കഥാപാത്രങ്ങളുടെ പ്രകടനം കൊണ്ട് സിനിമ എൻഗേജിങ് ആകുന്നുണ്ടെങ്കിലും പുട്ടിന് പീര എന്നപോലുള്ള പാട്ടുകളും ഉപ്പില്ലാത്ത കഞ്ഞിയില്ല എന്നപോലൊരു നായികയും സിനിമയ്ക്ക് ബാധ്യതയാകുന്നു. വിജയ് തന്റെ സ്ഥിരം ഫോർമാറ്റിലുള്ള അഭിനയം കാഴ്ച വെച്ചപ്പോൾ ശരത് കുമാർ, ജയസുധ, എസ് ജെ സൂര്യയുടെ ഗസ്റ്റ് റോൾ എന്നിവ മാത്രമായിരുന്നു സിനിമയിൽ ആകെയുള്ള ആശ്വാസം.
പ്രകാശ് രാജിന്റെ വില്ലൻ കഥാപാത്രം ഒക്കെ എന്തിനോ വേണ്ടി തിളയ്ക്കുന്ന സാമ്പാർ പോലെയാണ് അനുഭവപ്പെട്ടത്.

പൊങ്കൽ ലക്ഷ്യമാക്കി വന്ന സിനിമ വിജയ് ആരാധകരെയും കുടുംബ പ്രേക്ഷകരെയും ഒരു പരിധിവരെ തൃപ്തിപ്പെടുത്തുമെങ്കിലും സാധാരണ ഒരു പ്രേക്ഷകൻ എന്ന നിലയിൽ എനിക്ക് ശരാശരി സിനിമാ അനുഭവം മാത്രമായേ തോന്നിയുള്ളൂ. തിയേറ്ററിൽ ഫാൻസിനൊപ്പം ഓളത്തിൽ ഒന്ന് കണ്ടു മറക്കാം എന്നല്ലാതെ യാതൊരുവിധ പുതുമയും സിനിമ സമ്മാനിക്കുന്നില്ല. തമന്റെ പാട്ടുകളും പശ്ചാത്തല സംഗീതവും തരക്കേടില്ലെങ്കിൽ കൂടിയും സിനിമയിൽ പ്ലേസ് ചെയ്ത രീതി ഇഷ്ടപ്പെട്ടില്ല. ആദ്യപകുതിയിൽ മാത്രം മൂന്ന് പാട്ടുകൾ ഉണ്ട്. ഒരു മാസ്സ് മസാല സിനിമ ആവശ്യപ്പെടുന്ന എല്ലാത്തരം ഏലമെന്റും സിനിമയിൽ കാണാമെങ്കിലും വിജയ് എന്ന നടന്റെ യാതൊരു മാറ്റവുമില്ലാത്തതും തന്റെ തന്നെ മുൻ സിനിമകളിലെ ഡയലോഗുകളും മാനറിസങ്ങളും വീണ്ടും വീണ്ടും യൂസ് ചെയ്യുന്നതും തീർത്തും അരോചകമായി തോന്നി. പ്രത്യേകിച്ച് രണ്ടാം പകുതിയിൽ, തെലുങ്ക് സിനിമയാണോ കാണുന്നത് എന്നുപോലും ചില അവസരങ്ങളിൽ ഓർത്തുപോയി.

ഒരുവട്ടം കണ്ടു മറക്കാവുന്ന ഒരു തമിഴ് - തെലുങ്ക് മിശ്ര സിനിമയാണ് വാരിസ്. പ്രതീക്ഷ മുഴുവൻ T67 ൽ ആണ്. വിജയ് താങ്കൾ വല്ലപ്പോഴും എങ്കിലും സ്ഥിരം ഫോർമാറ്റിൽ നിന്ന് മാറി, മുഴുവനായിട്ട് അല്ലെങ്കിൽ കൂടിയും തുപ്പാക്കി, കത്തി, മേഴ്സൽ ഒക്കെ പോലൊരു ക്വാളിറ്റി സിനിമയ്ക്ക് വേണ്ടി കാത്തിരിക്കുന്നു. താങ്കളുടെ പഴയ സിനിമകളിൽ നിന്ന് ഇനിയെങ്കിലും മോചനം കിട്ടട്ടെയെന്ന് അതിയായി ആഗ്രഹിക്കുന്നു.

#Naaz373 😊