Viduthalai Part 1 (2023) - Movie Review

  

🎥  വിടുതലൈ - പാർട്ട് 1(2023)

സംവിധാനം:- വെട്രിമാരൻ

തമിഴ് ഫിലിം ഇൻഡസ്ട്രിയിലെ ബെഞ്ച്മാർക്ക് സംവിധായകരിൽ ഒരാളായ വെട്രിമാരൻ, തന്റെ സിനിമയാണ് തന്റെ രാഷ്ട്രീയം എന്ന് തന്റേടത്തോടെ പറഞ്ഞ സംവിധായകൻ, സാമൂഹ്യ വ്യവസ്ഥിതികളെ ചോദ്യം ചെയ്യാൻ മടിയില്ലാത്ത മനുഷ്യൻ അങ്ങനെ അയാൾക്ക് എത്രയധികം വിശേഷണങ്ങൾ നൽകിയാലും മതിയാവില്ല. ആടുകളം മുതൽ ഇന്ന് വിടുതലൈ വരെ എത്തിനിൽക്കുന്ന അദ്ദേഹത്തിന്റെ സിനിമകൾ എല്ലാം തന്നെ എക്കാലവും പ്രസക്തിയുള്ളതാണ്. അടിച്ചമർത്തപ്പെട്ടവന്റെ, അക്രമിക്കപ്പെട്ടവന്റെ, പാർശ്വവൽക്കാരിക്കപ്പെട്ടവന്റെ ശബ്ദമാണ് അയാളുടെ ഓരോ സിനിമയും. അതിലെ ഏറ്റവും ഒടുവിലെ ഉദാഹരണമാണ് ഈ സിനിമ. സൂരി, വിജയ് സേതുപതി, ഗൗതം മേനോൻ, ഭവാനി ശ്രീ തുടങ്ങിയവർ പ്രധാന കഥാപാത്രങ്ങളെ അവതരിപ്പിച്ച സിനിമ തിയേറ്റർ റിലീസായി ഈ വർഷം പുറത്തിറങ്ങി ഗംഭീര അഭിപ്രായങ്ങൾ സ്വന്തമാക്കി. 

ജയമോഹൻ എഴുതിയ തുണൈവൻ എന്ന ചെറുകഥയെ ആസ്പദമാക്കിയാണ് സിനിമ എടുത്തിരിക്കുന്നത്. 1987ൽ നടന്ന പോലീസും പ്രാദേശിക വിഭാഗവും തമ്മിലുള്ള സംഘർഷവും തുടർ സംഭവങ്ങളുമാണ് സിനിമയുടെ പ്രമേയം.

പോസിറ്റീവ്

സൂരി എന്ന നടന്റെ കരിയറിലെ ഒരു ബ്രേക്ക് ആയിരിക്കും ഈ സിനിമ. ആദ്യമായി നായക വേഷം ചെയ്തപ്പോൾ പ്രേക്ഷകന് ലഭിച്ചത് അയാളുടെ കരിയർ ബെസ്റ്റ് പെർഫോമൻസ് ആണ്. കുമരേശൻ എന്ന സാധാരണ പോലീസ് ഉദ്യോഗസ്ഥനെ അയാൾ ഗംഭീരമായി തന്നെ തിരശീലയിൽ എത്തിച്ചു. ഒപ്പം നായികാ കഥാപാത്രം ചെയ്ത ഭവാനി ശ്രീ, ഗൗതം മേനോൻ, ചെറിയ റോൾ ആണെങ്കിലും കഥയിൽ വളരെ പ്രാധാന്യമുള്ള വേഷത്തിൽ വന്ന വിജയ് സേതുപതി അങ്ങനെ ചെറിയ വേഷങ്ങളിൽ വന്നവർ പോലും അവരവരുടെ ഭാഗം മികവുറ്റതാക്കി. 

സിനിമയുടെ ആദ്യത്തെ പത്ത് മിനിറ്റിൽ വരുന്ന ഒരു സിംഗിൾ ഷോട്ട് സീൻ ഉണ്ട്. 8 കോടി രൂപ ചെലവിട്ടാണ് ആ സീൻ മാത്രം ഷൂട്ട് ചെയ്തത് എന്ന് കേട്ടു. ആ ഒരൊറ്റ സീൻ മതി സിനിമയുടെ ക്വാളിറ്റി എന്തെന്ന് മനസിലാക്കാൻ. അത്രയ്ക്ക് പെർഫെക്ഷനോട് കൂടിയാണ് വെട്രിമാരൻ അത് ചെയ്തു വെച്ചിരിക്കുന്നത്. ഇളയരാജയുടെ സംഗീതം, ബിജിഎം സിനിമയുടെ മൂഡിന് ചേർന്ന് നിൽക്കുന്നത് ആയിരുന്നു. വേൽരാജിന്റെ ഛായാഗ്രഹണവും സിനിമയെ കൂടുതൽ അനുഭവവേദ്യമാക്കി. ചില രംഗങ്ങൾ ഒക്കെ വയലൻസ് അൽപ്പം കൂടുതൽ ആണ്. അത് സിനിമ അവശ്യപ്പെടുന്നുമുണ്ട്. 

നെഗറ്റീവ്

വെട്രിമാരൻ സിനിമയിൽ നെഗറ്റീവ് തപ്പി പോകുന്നത് പോലൊരു മണ്ടത്തരം വേറെയില്ലാത്തത് കൊണ്ട് അതിന് മുതിരുന്നില്ല. 

എന്റെ അഭിപ്രായം

വെട്രിമാരൻ സിനിമകൾ ഓരോ കാലത്തെയും അന്നത്തെ സാമൂഹിക വ്യവസ്ഥിതികളെയും വരച്ചു കാണിക്കുന്ന നേർചിത്രങ്ങളാണ്. അത്തരമൊരു സിനിമ തന്നെയാണ് വിടുതലൈ. രാഷ്ട്രീയ, സാമുദായിക, ചങ്ങലകൾ ഒക്കെ പൊട്ടിച്ചെറിഞ്ഞു കൊണ്ട് സ്വാതന്ത്ര്യം ആണ് എല്ലാറ്റിലും വലുതെന്നുള്ള സത്യം വിളിച്ചു പറഞ്ഞ സിനിമ എന്ന നിലയിൽ തീർച്ചയായും കണ്ടിരിക്കേണ്ട, അറിഞ്ഞിരിക്കേണ്ട കാര്യങ്ങൾ ആണ് സിനിമ സംവദിക്കുന്നത്. രണ്ടാം ഭാഗത്തിനായി കൂടുതൽ ആകാംക്ഷയോടെ കാത്തിരിക്കുന്നു.

#Naaz373 😊

Movie Info :-

Directed by: Vetrimaaran

Written by: Vetrimaaran, B. Jeyamohan

Produced by: Elred Kumar

Starring: Soori, Vijay Sethupathi, Bhavani Sre, Gautham Vasudev Menon

Cinematography: R. Velraj

Music by: Ilaiyaraaja

Production company: RS Infotainment, Grass Root Film Company

Release date: 31 March 2023

Running time: 150 minutes

Country: India.

Language: Tamil

Movie info source : Wikipedia.

 

 Movie Download / Watch trailer on https://youtu.be/GYeSfq_bj_M