O Baby (2023) - Movie Review

  

 

🎥  O Baby (2023)

A Film by Ranjan Pramod

Overview -

തിരക്കഥാകൃത്തായ രഞ്ജൻ പ്രമോദ് രക്ഷാധികാരി ബൈജു എന്ന ചിത്രത്തിന് ശേഷം സംവിധായകന്റെ കുപ്പായം വീണ്ടും അണിഞ്ഞ സിനിമയാണ് ഒ ബേബി. ദിലീഷ് പോത്തൻ ടൈറ്റിൽ റോളിൽ എത്തിയപ്പോൾ ഒപ്പം ഒരുപിടി മികച്ച അഭിനേതാക്കളും അണിനിരന്ന സിനിമ കാടിന്റെ വന്യതയും വശ്യതയും ഒരേപോലെ ഒപ്പിയെടുത്ത ഒരു മികച്ച അനുഭവമായി മാറുന്നു. പ്രണയവും സൗഹൃദവും വാശിയും വേഗവും കാമവും എല്ലാം ഒരേപോലെ ബ്ലെൻഡ് ചെയ്തെടുക്കാൻ സംവിധായകന് കഴിഞ്ഞു. 

തിരുവോലച്ചാൽ എന്ന പ്രമാണിത്തമുള്ള കുടുംബവും പൂർവികന്മാർ മുതലേ അവരുടെ അടിയാളന്മാർ ആയ ദളിതനും സാധാരണക്കാരനുമായ ഒതയത്ത് ബേബിയെന്ന ഒ. ബേബിയുടെ കഥയും അയാൾ കടന്നു പോകുന്ന ജീവിത സഹചര്യങ്ങളുമാണ് സിനിമയുടെ പ്രമേയം. പല തലങ്ങളിലൂടെ കഥ പറയുന്ന ചിത്രം ഒരേസമയം നല്ലൊരു കുടുംബ ചിത്രവും അതേസമയം മികവുറ്റ ത്രില്ലറുമാണ്. 

പോസിറ്റീവ്

ദിലീഷ് പോത്തന്റെ പെർഫോമൻസ് തന്നെയാണ് സിനിമയുടെ ഹൈലൈറ്റ്. കയ്യടക്കത്തോടെയും കൺട്രോൾഡ് ആയിട്ടുള്ളതുമായ പ്രകടനം കൊണ്ട് അദ്ദേഹം ടൈറ്റിൽ റോൾ ഗംഭീരം ആക്കിയപ്പോൾ ഒപ്പമുണ്ടായിരുന്ന വരും അവരവരുടെ റോളുകൾ മികച്ചതാക്കി. അതിൽ തന്നെ എടുത്ത് പറയേണ്ട പ്രകടനങ്ങളാണ് ദിലീഷ് പോത്തന്റെ മകന്റെ റോൾ ചെയ്‌ത പയ്യൻ (പേരറിയില്ല), വിഷ്ണു അഗസ്ത്യയുടെ സ്റ്റാൻലി, രഘുനാഥ് പലേരിയുടെ കുട്ടച്ചൻ, തുടങ്ങിയവർ. അച്ഛൻ - മകൻ റിലേഷൻ വളരെ നല്ല രീതിയിൽ തന്നെ എസ്റ്റാബ്ലിഷ് ചെയ്യാൻ കഴിഞ്ഞപ്പോൾ അവരുടെ ഇമോഷൻസുമായി പ്രേക്ഷകനെ എളുപ്പം കണക്റ്റ് ചെയ്യിക്കാനും സംവിധായകന് സാധിച്ചു എന്ന് പറയാം. സൗണ്ട് ഡിസൈൻ, അത്യാവശ്യത്തിന് മാത്രം ഉണ്ടായിരുന്ന ബാക്ക്ഗ്രൗണ്ട് സ്കോർ, വനത്തിന്റെ മനോഹാരിതയും മരണ ഭീതിയും ഒരേപോലെ പകർത്തിയെടുത്ത ഛായാഗ്രഹണ മികവ് തുടങ്ങിയവ എല്ലാം സിനിമയുടെ മാറ്റ് കൂട്ടി. ഒരിക്കലും പ്രതീക്ഷിക്കാത്ത തരത്തിലുള്ള ക്ലൈമാക്സ് ആണ് സിനിമയുടേത് എന്നാണ് എനിക്ക് തോന്നിയത്. അതുകൊണ്ട് തന്നെ ക്ലൈമാക്സിൽ രണ്ട് അഭിപ്രായങ്ങൾ വരാൻ സാധ്യത ഉണ്ട്. എന്നാൽ പ്രേക്ഷകരുടെ ചിന്തയ്ക്ക് വിട്ട് കൊടുത്ത ആ ക്ലൈമാക്സ് ട്വിസ്റ്റ് എനിക്ക് കൂടുതൽ ഇഷ്ടമായി.

നെഗറ്റീവ്

വല്യപ്പന്റെ കഥാപാത്രം പറയുന്ന ചില ഡയലോഗുകൾ ക്ലിയർ ആയില്ല എന്നത് ചിലയിടങ്ങളിൽ കല്ലുകടി ആയി മാറിയത് ഒഴിച്ച് നിർത്തിയാൽ സിനിമ ശരാശരിയ്ക്കും മുകളിലുള്ള എക്സ്പീരിയൻസ് സമ്മാനിച്ചു. രണ്ട് മണിക്കൂറിനുള്ളിൽ ഒതുക്കിയതും സിനിമ ലാഗ് ഫീൽ ചെയ്യിപ്പിച്ചില്ല. 

എന്റെ അഭിപ്രായം

മൃഗങ്ങളെയും മനുഷ്യരേയും വേട്ടയാടി ജീവിക്കുന്ന, കാട് തങ്ങളുടേത് മാത്രമാണെന്ന ചിന്തയിൽ മറ്റുള്ളവരെ അടിമകൾ ആക്കി വെച്ചുകൊണ്ട് പ്രമാണിത്തം ചമയുന്ന ഫ്യൂഡൽ മുതലാളിമാരുടെയും അവരുടെ അടിമത്തത്തിന്റെ ചങ്ങല പൊട്ടിച്ചെറിഞ്ഞു പുറത്ത് കടക്കുന്ന കീഴാളൻമാരുടെയും കഥ ഗംഭീരമായി വരച്ചു കാണിക്കുന്ന സിനിമയാണ് ഒ. ബേബി. നല്ലൊരു ഡോൾബി അറ്റ്മോസ് തിയേറ്ററിൽ നിന്ന് തന്നെ കാണാൻ ശ്രമിക്കുക. ബേബിയും കൂട്ടരും നിങ്ങളെ നിരാശപ്പെടുത്തില്ല. കാടിന്റെ കറുപ്പിൽ അനുഭവിച്ചറിയേണ്ട സിനിമ.

#Naaz373 😊