TURBO (2024) MALAYALAM MOVIE REVIEW

 

🎬 TURBO (2024)

DIRECTED BY VAISHAKH 

മോൺസ്റ്റർ എന്ന പടു ദുരന്തത്തിന് ശേഷം വൈശാഖിന്റെ സംവിധാനത്തിൽ വരുന്ന സിനിമ, ഫീനിക്സ് എന്ന ഓവർ റേറ്റഡ് ക്ലിഷേ സിനിമയ്ക്ക് ശേഷം മിഥുൻ മാനുവൽ തോമസിന്റെ സ്ക്രിപ്റ്റിൽ വരുന്ന സിനിമ, എല്ലാവർക്കും ഇഷ്ടം ആയിട്ടും പേഴ്സണലി എനിക്ക് തീരെ വർക്ക്‌ ആവാതിരുന്ന ചിത്രത്തിന്റേതായി പുറത്ത് വന്ന ട്രയ്ലർ ഇവയൊക്കെ എന്നിലെ പ്രതീക്ഷകൾ കാറ്റിൽ പറത്തി എങ്കിലും മമ്മൂട്ടി കമ്പനി എന്ന പ്രൊഡക്ഷൻ കമ്പനിയിലും ആ മനുഷ്യനിലും മാത്രമുള്ള വിശ്വാസം കൊണ്ട് ആദ്യ ദിനം തന്നെ ടർബോ ജോസിനെ കാണാനായി ടിക്കറ്റ് എടുത്തു. ബാക്കി വഴിയേ പറയാം...

പോസിറ്റീവ്

മമ്മൂട്ടി എന്ന മെഗാ പെർഫോമർ

പറഞ്ഞു പഴകിയത് ആണ്, എന്നാലും സാരമില്ല, ആ മനുഷ്യൻ ഈ എഴുപത്തി മൂന്നാം വയസ്സിലും എടുക്കുന്ന എഫർട്ട് ഒന്ന് കൊണ്ട് മാത്രം നിങ്ങൾക്ക് ഈ സിനിമ കാണാം. കാരണം അങ്ങേരുടെ മാക്സിമം ഈ സിനിമയ്ക്ക് വേണ്ടി നൽകിയിട്ടുണ്ട്. അതിനിടയിൽ നായകൻ ഫ്ലാഷ്ബാക്ക് പറയുന്ന വെറും ഡയലോഗ് മാത്രമുള്ള ഒരു അഞ്ച് മിനിറ്റ് സീൻ ഉണ്ട്. 'കിഴക്കൻ മലയിലെ ഉരുൾപൊട്ടലിന്റെ കഥ' പറയുമ്പോൾ ആ മനുഷ്യന്റെ ശബ്ദം ഒന്നിടറുന്നുണ്ട്. ആ സൗണ്ട് മോഡുലേഷൻ കൊണ്ട് മാത്രം ആ സീൻ വിഷ്വലൈസ് ചെയ്തു കാണിക്കണം എങ്കിൽ ആ നടന്റെ പേര് മമ്മൂട്ടി എന്നായിരിക്കണം. കുറെ കാലത്തിന് ശേഷം മമ്മൂക്കയുടെ കോമഡി ട്രാക്കിൽ വരുന്ന കഥാപാത്രം അങ്ങേര് ഗംഭീരം ആയി ചെയ്തു വെച്ചിട്ടുണ്ട്.

ഭീഷ്മ പർവത്തിന് ശേഷം വരുന്ന ഔട്ട് ആൻഡ് ഔട്ട് ആക്ഷൻ കോമഡി എന്റർടെയ്നർ എന്ന നിലയിൽ ഈ സിനിമ ആർക്കും ഒരു തവണ തിയറ്ററിൽ എക്സ്പീരിയൻസ് ചെയ്യാം. എന്നു കരുതി ടർബോ ഇതുവരെ കാണാത്ത തരത്തിലുള്ള മാസ്സ് സിനിമ ആണെന്ന് അർത്ഥമില്ല. അതിനൊക്കെയുള്ള കാരണങ്ങൾ പിന്നാലെ പറയാം. 

രാജ് ബി ഷെട്ടി aka വെട്രിവേൽ ഷണ്മുഖ സുന്ദരം

കന്നഡ സിനിമ കാണുന്നവർക്ക് അറിയാം ഇങ്ങേരുടെ റേഞ്ച് എന്താണെന്ന്, എഴുത്തും സംവിധാനവും അഭിനയവും എല്ലാം ഒരേപോലെ വഴങ്ങുന്ന ഈയൊരു ഗംഭീര മുതൽ കൂടി ഓൺ ബോർഡ് ഉള്ളത് കൊണ്ടാണ് ഈ സിനിമ കാണാൻ തീരുമാനിച്ചത്, അത് പെർഫോമൻസ് കൊണ്ട് ഇരട്ടിയായി പുള്ളി തിരിച്ചു തന്നു എന്ന് നിസ്സംശയം പറയാവുന്ന തരത്തിലുള്ള മാരക പെർഫോമൻസ്. നായകന്റെ ഇൻട്രൊയേക്കാൾ രോമാഞ്ചം തോന്നിയത് ഇങ്ങേരുടെ വരവിനായിരുന്നു. 

ആക്ടിങ് + ആക്ഷൻ + നല്ല കട്ട വില്ലനിസം = രാജ് ബി ഷെട്ടി എന്ന് പറഞ്ഞാലും തീരെ അതിശയോക്തി ആവില്ല. 

ഫീനിക്സ് പ്രഭു ഒരുക്കിയ ആക്ഷൻ സീക്വൻസുകൾ

സിനിമയെ കുറച്ചെങ്കിലും ലൈവ് ആക്കി നിർത്തുന്നത് നല്ല രീതിയിൽ മേക്ക് ചെയ്തു എടുത്ത ആക്ഷൻ രംഗങ്ങൾ ആണെന്ന് പറയാം. മമ്മൂക്കയുടെ പ്രായത്തിന്റെ പരിമിതികൾക്ക് ഉള്ളിൽ നിന്ന് കൊണ്ട് തന്നെ മികച്ച രീതിയിൽ അത് ഒരുക്കിയിട്ടുണ്ട്. അടി പടം വേണമെന്ന് പറഞ്ഞ പ്രേക്ഷകന് എന്തായാലും മമ്മൂക്ക നല്ല ഹൈ ഡോസ് അടി പടം തന്നെ നൽകി. അതിന്റെ ഫുൾ ക്രെഡിറ്റ് ആക്ഷൻ ഡയറക്ടർ ഫീനിക്സ് പ്രഭുവിന് തന്നെയാണ്. കാർ ചേസിങ്, ഡ്രിഫ്റ്റിങ് സീനുകൾ കൂടെ ഇതിനൊപ്പം എടുത്ത് പറയണം. എന്തുകൊണ്ടും ഗംഭീര വർക്ക്.

ക്രിസ്റ്റോ സേവ്യർ ഒരുക്കിയ മ്യൂസിക് ആൻഡ് ബിജിഎം

ആക്ഷൻ രംഗങ്ങൾ പോലെ തന്നെ സിനിമയെ ത്രൂ ഔട്ട് ഗ്രിപ്പ് ചെയ്തു നിർത്തിയ ബാക്ക്ഗ്രൗണ്ട് സ്കോർ. അതിൽ തന്നെ ആ തുടക്കത്തിലും ഒടുക്കത്തിലും പ്ലേസ് ചെയ്ത ആ ട്രയ്ലർ തീം...🔥👌 ഒരു രക്ഷയുമില്ലായിരുന്നു. ആകെയുള്ള ഒരു സോങ്ങും തരകേടില്ലായിരുന്നു. ഭ്രമയുഗത്തിനു ശേഷം ചെക്കൻ വീണ്ടും ഞെട്ടിച്ചു. 

നെഗറ്റീവ്

കാസ്റ്റിങ് പോരായ്മകൾ

മമ്മൂട്ടി, രാജ് ബി ഷെട്ടി, ബിന്ദു പണിക്കർ, അഞ്ജന ജയപ്രകാശ്, ശബരീഷ് വർമ, തെലുങ്ക് നടൻ സുനിൽ, ദിലീഷ് പോത്തൻ തുടങ്ങിയവർ ആണ് സിനിമയിലെ പ്രധാന കഥാപാത്രങ്ങളെ അവതരിപ്പിക്കുന്നത്. എന്നാൽ യാതൊരു അവശ്യവുമില്ലാത്ത ഒരുപിടി ആളുകൾ കൂടെ സിനിമയിൽ വന്നു പോകുന്നുണ്ട്. അതിൽ എടുത്ത് പറയേണ്ടത് അഞ്ജന ജയപ്രകാശ് അവതരിപ്പിച്ച 'ഇന്ദുലേഖ' എന്ന കഥാപാത്രത്തിന്റെ സഹോദരിയുടെ വേഷം ചെയ്ത ആമിന നിജം എന്ന നടി ചെയ്ത 'നിരഞ്ജന' എന്ന കഥാപാത്രം ഒരു ഉദാഹരണം മാത്രം. അതുപോലെ മറ്റ് കുറച്ചു കഥാപാത്രങ്ങൾ കൂടി വെറുതെ വന്ന് പോകുന്നുണ്ട്. 

ആവറേജ് + പ്രീഡിക്ടബിൾ സ്ക്രിപ്റ്റ്

കൊറോണ സമയത്ത് മിഥുൻ എഴുതിയ പല സ്ക്രിപ്റ്റുകളിൽ ഒന്നാണ് ഇതെന്ന് കേട്ടിരുന്നു. ഫീനിക്സ് അതിലെ ഏറ്റവും മികച്ച ഏറു പടക്കം ആയിരുന്നു എങ്കിൽ ഇവിടെ അത് മറ്റൊരു ഗുണ്ട് ഐറ്റം ആണെന്ന് പറയേണ്ടി വരും. സംഗതി മാസ്സ് പടത്തിൽ ഇപ്പൊ എന്തിനാ വലിയ കഥ എന്ന് ചിന്തിക്കുന്ന വലിയൊരു കൂട്ടം സിനിമാക്കാരും പ്രേക്ഷകരും ഇപ്പോഴും ഇവിടെ ഉണ്ടെന്നുള്ളതിന്റെ ഏറ്റവും ഒടുവിലത്തെ ഉദാഹരണമാണ് ടർബോ. വില്ലൻ പറയുന്ന അതേ ഡയലോഗിൽ പറഞ്ഞാൽ "What A Typical Cliche Sir". 

ഏൽക്കാതെ പോയ ചില കോമഡികൾ + ജോസിന്റെ ഒരവശ്യവും ഇല്ലാത്ത രണ്ടാം വരവ്

സിനിമാക്കാർക്ക് പോലും വലിയ പ്രതീക്ഷ ഇല്ലെങ്കിലും ചുമ്മാ പഞ്ചിന് വേണ്ടി പടച്ചു വിടുന്ന സെക്കന്റ് പാർട്ടിന് വേണ്ടിയുള്ള കാട്ടി കൂട്ടലുകൾ ഇപ്പോഴത്തെ ഒരു ട്രെൻഡ് ആയി മാറിയിട്ടുണ്ട്. അത് പതിവ് പോലെ ഈ സിനിമയിലും കാണാം. ഇനിയെങ്കിലും ഈ അനാവശ്യ പരിപാടി ഒഴിവാക്കണം. എങ്ങാനും സിനിമ സൂപ്പർഹിറ്റ് ആയാൽ ഇതേ പാറ്റേണിൽ മറ്റൊരു ഉണ്ടംപൊരി ഐറ്റം കൂടി തട്ടിക്കൂട്ടി കാണിച്ചു പ്രേക്ഷകനെ പറ്റിക്കാം എന്നാണ് നിങ്ങളുടെ വ്യാമോഹം എങ്കിൽ അത് നടക്കില്ല എന്ന് ഇപ്പോഴേ പറയുന്നു. കാരണം അത്രയ്ക്ക് വെറുപ്പിക്കൽ ആയിട്ടാണ് എനിക്ക് ആ ടെയ്ൽ എൻഡ് സീൻ തോന്നിയത്. എനിക്ക് ഇഷ്ടമുള്ള ഒരു പ്രമുഖ നടന്റെ വോയ്‌സ് ഓവർ ഉണ്ടായിട്ട് പോലും ഈ സിനിമയ്ക്ക് അത് തീരെ യോജിക്കാത്ത വിധത്തിൽ ഉള്ള എൻഡിങ് ആയിരുന്നു. ടർബോ ഇവിടെ കൊണ്ട് തീരേണ്ട സിനിമയാണ്.

അതേപോലെ ഫസ്റ്റ് ഹാഫിലും സെക്കന്റ് ഹാഫിൽ ചിലയിടങ്ങളിലും അനാവശ്യമായി കുത്തി തിരുകിയ കോമഡികൾ എനിക്ക് ട്രാജഡി ആയിട്ടാണ് തോന്നിയത്. ഹെഡ്‌ഫോൺ വെച്ചു മീൻ വെട്ടുന്ന ഫ്രീക്കത്തി ആയ വല്യമ്മച്ചി മുതൽ സീരിയസ് സീനിൽ നായകന്റെ ഫോൺ കോൾ പോലും ഗൗനിക്കാതെ അയൺ മാൻ മരിക്കുന്ന സീൻ കണ്ട് നിലവിളിക്കുന്ന ഐറ്റം വരെയുണ്ട്. കൂടുതൽ പറഞ്ഞു പടം കാണാൻ താൽപ്പര്യം ഉള്ളവരെ മൂഡ് ഔട്ട് ആക്കുന്നില്ല. നിങ്ങൾക്ക് ചിലപ്പോൾ അത് വർക്ക് ആയേക്കാം, എനിക്ക് വർക്ക് ആയില്ല. 

എന്റെ അഭിപ്രായം

മമ്മൂക്ക പറഞ്ഞത് പോലെ അടി പടം വേണ്ടവർക്ക് നല്ല പെരുന്നാളിന്റെ വെടിക്കെട്ട് പോലുള്ള നല്ല ഹെവി ഡോസ് അടിയും ഇടിയും കാർ ചേസിങ്ങും ഒക്കെയായി രണ്ടര മണിക്കൂർ സമയം നിറഞ്ഞ തിയറ്ററിൽ ആഘോഷിച്ചു കാണാനുള്ള വകുപ്പ് സിനിമയിലുണ്ട്. എന്നാൽ വലിയ ലോജിക്കും ബ്രഹ്മാണ്ഡ കഥയും ഒക്കെ നോക്കി സിനിമ കാണാൻ പോകുന്നവർക്ക് ചിലപ്പോൾ നിരാശപ്പെടേണ്ടി വന്നേക്കാം. എന്തായാലും ഒരു കാര്യം ഉറപ്പ്‌ പറയാം. ഈ സിനിമ തിയറ്ററിൽ കാണുന്നതിന്റെ പകുതി എഫക്ട് ഓടിടി കണ്ടാൽ കിട്ടില്ല. അതുകൊണ്ട് തിയറ്റർ എക്സ്പീരിയൻസ് ഡിമാൻഡ് ചെയ്യുന്ന ഒരു ഫുൾ ഓൺ മാസ്സ് ആക്ഷൻ എന്റർടെയ്നർ ആണ് നിങ്ങൾക്ക് വേണ്ടതെങ്കിൽ നേരെ അടുത്തുള്ള തിയറ്ററിലേക്ക് വിട്ടോ...

#Naaz373 😊