GARUDAN (2024) TAMIL MOVIE REVIEW

 

🎬 GARUDAN (2024)

LANGUAGE : TAMIL

DIRECTED BY R S DURAI SENTHIL KUMAR

എതിർ നീച്ചൽ, കൊടി, പട്ടാസ് തുടങ്ങിയ സിനിമകൾ സംവിധാനം ചെയ്ത ദുരൈ സെന്തിൽ കുമാറിന്റെ ഏറ്റവും പുതിയ റിലീസ് ചിത്രമാണ് ഗരുഡൻ. സൂരി, ശശികുമാർ, ഉണ്ണി മുകുന്ദൻ, ശിവദ, സമുദ്രക്കനി തുടങ്ങിയവർ പ്രധാന കഥാപാത്രങ്ങളെ അവതരിപ്പിക്കുന്ന സിനിമയുടെ തിരക്കഥ എഴുതിയത് വെട്രിമാരനും കൂടെ ചേർന്നിട്ടാണ്. വിടുതലൈ എന്ന ഗംഭീര സിനിമയ്ക്ക് ശേഷം സൂരി പ്രധാന വേഷം അവതരിപ്പിക്കുന്ന സിനിമയുടെ ട്രെയിലറും, റിലീസ് ഡേ റെസ്പോൺസും തന്ന പ്രതീക്ഷയിലാണ് സിനിമയ്ക്ക് ടിക്കറ്റ് എടുത്തത്.

ആദി, കർണൻ എന്നീ സുഹൃത്തുക്കളും അവർക്കിടയിലേക്ക് എത്തിച്ചേരുന്ന ചൊക്കൻ എന്ന കഥാപാത്രവും തുടർന്നുള്ള അവരുടെ സൗഹൃദം, പ്രണയം, പകയും അത് മൂലം സംഭവിക്കുന്ന രക്ത ചൊരിച്ചിൽ അങ്ങനെ ഒരു ടെംപ്ലേറ്റ് വെട്രിമാരൻ സ്റ്റൈൽ സ്റ്റോറി ലൈൻ ആണെങ്കിൽ പോലും അതിനെ ത്രൂ ഔട്ട് എൻഗേജിങ് ആക്കി രണ്ടേകാൽ മണിക്കൂർ പ്രേക്ഷകനെ പിടിച്ചിരുത്താൻ സിനിമയ്ക്ക് സാധിക്കുന്നിടത്ത് ഗരുഡൻ മറ്റൊരു മികച്ച വെട്രിമാരൻ പ്രോഡക്ട് ആയി മാറുന്നു. 

മണ്ണിനും പെണ്ണിനും പൊന്നിനും വേണ്ടി പോരടിക്കുന്ന ഒരുകൂട്ടം ആളുകളുടെ കഥ കൂടിയാണ് ഗരുഡൻ. ഒരു റൂറൽ ആക്ഷൻ ത്രില്ലറിന് വേണ്ട എല്ലാ ചേരുവകളും സിനിമയിലുണ്ട്. എന്നാൽ വെറുമൊരു തട്ടിക്കൂട്ട് ചിത്രം ആയി മാറാത്ത തരത്തിലുള്ള മേക്കിങ്ങും, അഭിനേതാക്കളുടെ കിടിലൻ പ്രകടനങ്ങളും കൊണ്ട് സിനിമ മികച്ച ഒരു തിയറ്റർ എക്സ്പീരിയൻസ് സമ്മാനിക്കുന്നുണ്ട്. 

പോസിറ്റീവ്

വീണ്ടും ഞെട്ടിക്കുന്ന സൂരി

അതെ, വിടുതലൈക്ക് ശേഷം സൂരി എന്ന ഗംഭീര നടന്റെ മറ്റൊരു മാരക വേഷപ്പകർച്ച നിങ്ങൾക്ക് ഗരുഡനിൽ കാണാം. ചൊക്കൻ എന്ന കഥാപാത്രം ആയി ജീവിക്കുകയാണ് എന്ന് തോന്നുന്ന ലെവലിൽ ഉള്ള കിടിലൻ പെർഫോമൻസ്. ഓരോ സിനിമ കഴിയുംതോറും അയാൾ ഞെട്ടിച്ചു കൊണ്ടിരിക്കുന്ന കാഴ്ച അത്യധികം സന്തോഷം തോന്നുന്നതാണ്. വെറുമൊരു കോമഡി താരത്തിൽ നിന്നും ഇന്ന് അയാൾ എത്തിപ്പിടിച്ച ഉയരങ്ങൾ സിനിമ സ്വപ്നം കാണുന്ന എല്ലാവർക്കും ഇൻസ്പിറേഷൻ ആണ്.

പ്രകടന മികവുകൾ

സൂരിയെ പോലെ തന്നെ എടുത്ത് പറയേണ്ട പ്രകടനങ്ങൾ ആണ് ശശികുമാർ, ഉണ്ണി മുകുന്ദൻ, ശിവദ, സമുദ്രക്കനി തുടങ്ങിയവരും കാഴ്ച വെച്ചിരിക്കുന്നത്. മൂന്ന് പ്രധാന കഥാപാത്രങ്ങൾ തമ്മിലുള്ള കോമ്പിനേഷൻ കെമിസ്ട്രി സിനിമയിൽ നന്നായി വർക്ക് ഔട്ട് ആയിട്ടുണ്ട്. ശശികുമാറിന്റെ മകന്റെ വേഷം ചെയ്ത പയ്യനെയും പ്രത്യേകം പറയേണ്ട പ്രകടനങ്ങളിൽ ഒന്നായിരുന്നു. 

ത്രസിപ്പിക്കുന്ന ആക്ഷൻ സീക്വൻസുകൾ

മഹേഷ് മാത്യൂ ഒരുക്കിയ സിനിമയുടെ സംഘട്ടന രംഗങ്ങൾ എല്ലാം ഗംഭീരം ആയിരുന്നു. പ്രത്യേകിച്ച് ഇന്റർവെൽ ബ്ലോക്കും ക്ലൈമാക്സ് ഫൈറ്റും വേറെ ലെവൽ എന്ന് തന്നെ പറയേണ്ടി വരും. ആക്ഷൻ സീനുകൾ സിനിമയെ കൂടുതൽ എൻഗേജിങ് ആക്കി നിർത്തുന്ന ഘടകങ്ങളിൽ പ്രധാനപ്പെട്ടത് ആയിരുന്നു. 

നെഗറ്റീവ്

അങ്ങനെ എടുത്ത് പറയാൻ മാത്രമുള്ള നെഗറ്റീവ് ഒന്നും എനിക്ക് തോന്നിയില്ല. ഉണ്ണി മുകുന്ദന്റെ ഡബ്ബിങ് കുറച്ചുകൂടി നന്നാക്കാം ആയിരുന്നു എന്ന് തോന്നി. പക്ഷേ പെർഫോമൻസ് കൊണ്ട് പുള്ളി അതിനെ മറികടന്നു. അതേപോലെ സിനിമ ഒരു ടെംപ്ലേറ്റ് റൂറൽ ആക്ഷൻ ജേണറിൽ ആണ് അതിന്റെ കഥ പറഞ്ഞു പോകുന്നത്. അതുകൊണ്ട് തന്നെ സിനിമ ഏറെക്കുറെ പ്രീഡിക്ടബിൾ ആണ്. എന്നാൽ ഈ പറഞ്ഞതൊന്നും സിനിമയെ അത്ര വലിയ തോതിൽ ബാധിക്കുന്ന കാര്യങ്ങൾ അല്ല. 

എന്റെ അഭിപ്രായം

സ്ഥിരം ശൈലിയിൽ വരുന്ന സിനിമ ആണെങ്കിൽ പോലും ഈ സിനിമ തരുന്ന ഒരു തിയറ്റർ എക്സ്പീരിയൻസ് + കുറച്ചു നല്ല ക്വാളിറ്റി പെർഫോമൻസ് കാണാൻ വേണ്ടി ധൈര്യമായി ടിക്കറ്റ് എടുക്കാം. വെട്രിമാരൻ സ്റ്റൈൽ പടം തന്നെ ആണ്. അതുകൊണ്ട് അതിൽ കൂടുതൽ ഒന്നും പ്രതീക്ഷിച്ചു കൊണ്ട് ഈ സിനിമയെ സമീപിക്കരുത്. എന്നിലെ പ്രേക്ഷകന് സംതൃപ്തി നൽകാൻ സിനിമയ്ക്ക് കഴിഞ്ഞു. അതുകൊണ്ട് തന്നെ ഞാൻ ഈ സിനിമ നിങ്ങൾക്കായി റെക്കമന്റ് ചെയ്യുന്നു. ബാക്കി നിങ്ങൾ നേരിട്ട് കണ്ട് തീരുമാനിക്കുക.

#Naaz373 😊